ياجماعة حتى المخابيل تغيروا بهالزمن
گبل چان اكثر شي يحلم بيه مخبل 10 فلوس لو فد نعال مشروگ من صفحته لو مصاصة ياخذها ويركض
اشو هالايام انگلبت الآية وحتى المخابيل تغيرت طموحاتهم
الهتر بن الهتر علي صگبان
خبل معروف من هو زعطوط
ويگولون چانت هوايته يخنگ بزازين لو يجمع صراصير
اشو هذا الخبل من كبر تطورت طموحاته وصارت هوايته الاولى والاخيرة اللغف ثم اللغف ثم الخمط ثم اللغف مرة ثانية،
يريد يقبر الفگر فد مرّة، حتى تگوم الناس تحترمه ومايصيحوله علي الهتر او علي الخبل.
الاخ هالأيام ديتحرك منّا ومنّا ويتوسط ويتحشك بلكي يسووه امين بغداد !!!!!
الله اكبر
(عليوي الخبل) يصير امين بغداد مرة وحده !!!!
صدگ العيال كبرت
زين هذا الخبل اذا اجته الحالة وشاش وهو بالاجتماع شراح يسوي بالوكلاء والمدراء العامين والموظفين….؟؟؟
يمكن (مصياده) ام 13 بيده وتارس عبّه حصوو ويوگعلهم نگد ، لو توثية نص اخمص ويطلع عالمواطنين ويخلّي منطردهم ماله والي !!!

دخيلك دولة الرئيس الكاظمي، تره دولتنا طاح حظها حيل بحيث طمع بيها مشعان وابن صگبان…. !!!
نريد منك ترجعلنا هيبتها وكيانها وقوتها، حتى مايجي يوم اگشر يحلم بيه الخبل والهتر والدايح يصير مسؤول ويتحكم برقاب العراقيين.
تره مصخت حيل وطلعت من ماعونها….!